کبھی تاریخ کے اوراق پلٹو تو کھلے تم پر
وباؤں کا تو پورا سلسلہ ہے
وبائیں دستکیں دیتی رہی ہیں وقفے وقفے سے
وبائیں جب بھی آتی ہیں
زمین و آسماں ماتم کناں ہوتے ہیں ایسے ہی
ہزاروں گھر بکھر جاتے ہیں لمحوں میں
پرندے آشیانوں میں سمٹ کر بیٹھ جاتے ہیں
سبھی انسانیت افسردگی کے دام میں ایسے لپٹتی ہے
کہ جیسے کوئی چڑیا زیر پر منقار کو رکھ لے
روابط ٹوٹ جاتے ہیں
تعلق کی دیواریں منہدم ہو نے کو آتی ہیں
معاشی ابتری سے شاہراہیں یوں اٹی ہوتی ہیں
جیسے بھوک کا سیلاب بے قابو
ہزاروں خودکشی کی داستانیں
انگنت اموات
۔۔۔۔۔۔۔۔۔۔۔۔۔۔۔۔۔۔۔
غرض یہ کہ
وباؤں کے توسط سے
نہ جانے کیسی کیسی آفتیں
انسانیت پر وار کر تی ہیں
۔۔۔۔۔۔۔۔۔۔۔۔۔۔۔۔۔۔۔۔۔
کبھی سوچا ہے تم؟
آسماں والا
زمیں والوں پہ کیوں ایسی وبائیں بھیج دیتا ہے
بہت ممکن ہے
وہ ناراض ہو ہم سے
چلو ایسا کریں
اپنے گناہوں کی معافی مانگ لیں ہم سب
کہ رب ناراض ہو جائے
تو سجدوں اور دعاؤں، آنسوؤں سے
مان جاتاہے