வண்டினம் புடைசூழத் தேன் சொரியும் மலரோ
முன் கண்டிடாத விந்தை இவளெனக் காதோடு பேசிடும் மயிலினமோ
கொஞ்சி குலாவும் அணில் பிள்ளைகள்
அவள் பிஞ்சு விரல் பாதம் வருடிக்
கெஞ்சி விளையாட அழைக்குமோ
அதைக் கண்டு வியந்த மான் கூட்டம்
மெல்லச் சூழ்ந்து அவளை முத்தமிட்டதோ
புல்லின் நுனியில் சிறைப்பட்ட பனித்துளிகள்
அவள் பாதம் பட்டதால் மோச்சம் பெற்றதோ
தேவதை கைப்பட்டுக் கடந்த நதிநீர்
பசுவின் வாய்ப்பட அது தித்தித்ததோ
இயற்கை சுழற்சியை இடைமறித்து
இரவு பகல் இடமாற்றிய பெண் எவளோ
தான் செல்லும் பாதை மறந்து
தடம்மாறி புவி வந்த தேவலோக வாசியோ
போற்றும் மங்கையின் தனிப்பெயர் யாதோ
கண்டறிந்த தேவர்கள் காதில் கூரிய
மந்திரம் என் காதலியின் பெயர்தானோ!!!