Ek purani almari dekhi thi maine,
Kisi kone mein,
Dher saari kitaben honi chahiye thi waha,
Par kuch bin ahamiyat ki cheezen thi,
Jiski zarurat hogi kisi ko,
Mujhe nahi thi,
Socho agar kitaben hoti waha,
Unme se ek kitab tumhari likhi hui,
Jise main har roz padhta,
Shabdo ko sunta tumhari awaaz mein,
Din nikal jaata yun hi,
Tumhe yaad karte karte,
Jaise ab tak nikli hain,
Subah hote hi aankh kholta hoon,
Toh tum dikhti ho,
Aaj bhi,
Din bhar zehn mein mere rehti ho,
Thak jaata hoon toh yaadon mein meri basti ho,
Ro lu toh ashkon se beh jaati ho,
So jaata hoon toh sapno mein chali aati ho,
Mujhe satane ko,
Mujhe hasaane ko,
Mujhe pukaarne ko,
Haan main aa raha hoon,
Tum rahogi na,
Mere saath,
Kisi baat ka darr nahi ab,
Bus fanaa ho jaana hain,
Aag mein jhulas jaana hain,
Is purani almari mein aag lag jaane do,
Magar tumhari kitab jalegi nahi,
Kyunki woh tumhari likhawat hogi,
Ek dhaarmik granth jaisi,
Waisa hi kuch,
Saccha sa,
Warna is kavita ko likhne ka kya phaayda,
Aur tumhari likhi hui kitab ko padhne ka kya phaayda,
Use badal kar nahi,
Dimaag se nahi,
Dil se likkho,
Phir dekhna tum,
Aag mein pani girne par bhi,
Woh kabhi bujhega nahi,
Humesha jalte rahega,
Ek mashaal ki tarah,
Seene mein,
Tumhare bhi,
Aur mere bhi.